လူတိုင်းလူတိုင်းတွင် မတူညီသော ဘဝများရှိသည်။ မတူညီသော လက္ခဏာများရှိသည်။ တစ်ချို့ဘဝများသည် သာယာမှုများပြီး တချို့သောဘဝတို့မှာ မျက်ရည်ခါးခါးကျတတ်သည်။ ပျော်ရွှင်ခြင်းအတိပြီးသည့် ဘဝမျိုးသည် မတည်မြဲသောဤလောကတွင် မရှိနိုင်ပါ။
ကျမတို့တွေးထင်ထားသော ရွှေအိမ်စံမင်းသမီးဘဝသည်လည်း ကြိတ်၍ငိုသော အချိန်များရှိနေမည်မှာ။ သို့သော် တစ်ချို့သူများသည် ထိုဒုက္ခများအား လျော့နည်းစွာရတတ်ကြသည်။ ဗုဒ္ဓဘာသာတို့က ထိုလူများကို ဘဝပေးကောင်းသည်ဟုဆိုကြသည်။
ကျမဘဝသည်လည်း ပျော်ရွှင်စရာ ခေတ္တခဏတို့ ရှိခဲ့သလို .. ဝမ်းနည်းစရာ အိပ်မက်ညတို့ ရှည်ခဲ့ဖူးသည်။ ဘဝပေးကံမကောင်းသည်လား ဘုရားသခင် အလိုမကျ၍လားတော့မသိ .. ရုန်းကန်ခြင်းများ၊ မျက်ရည်များနှင့် မိတ်ဆွေဖွဲ့ခဲ့ရသည်မှာ အင်မတန်ကို များခဲ့သည်။ ထိုဘဝကိုပေးခဲ့သည်မှာ မိဘများလော လောကဓံတရားလော။
“အမွေပြတ် စွန့်လွှတ်ခြင်း” ဆိုသောသတင်းကို သင်ဖတ်ဖူးမည်ထင်ပါသည်။ သားသမီးဟု ခေါ်သူများက မိဘဆိုသောသူများအား စိတ်ဆင်းရဲစေသည့်အရာများ ပြုလုပ်ခြင်းကြောင့် ထိုမိဘများက ထိုသားသမီးများကို နောင်တွင် အတွေ့မခံ၊ သေလည်း ဘာမှမချန်၊ ထိုနည်းထိုဟန်ဖြင့် အမွေပြတ် စွန့်လွှတ်တတ်ကြသည်။ သို့သော် သတိထားမိလျှင် သိနိုင်ပါသည်။ ထိုကဲ့သို့သော သတင်းများတွင် ကံတ္တားတို့သည် မိဘများသာဖြစ်ပြီး ကံများသည် သားသမီးတို့ဖြစ်ကြသည်။
အသက် အရွယ်ပိုင်းခြားနားခြင်းသည် ဤဖြစ်ရပ်၏ တရားခံလော သို့မဟုတ် လူ့လောကသို့ စောလို့ ရောက်နေသောမိဘများက အနိုင်ကျင့်ခြင်းလော။ ထိုအဖြေကို ကျမ မသိပါ။ သိအောင်လည်း ဖြေသူမရှိခဲ့ပါ။
ဤအသက်အရွယ် လေးဆယ်ဟူသောပမာနဖြင့် နားလည်ထားသော တချို့အရာများရှိသလို သင်ယူရမည့် သဘာဝများလည်းရှိသေးသည်။ ကျမသည် မိခင်ဘဝရောက်ပြီ ထို့အတူ သမီးတစ်ယောက်လည်း ဖြစ်ခဲ့ဖူးသည်။
လွန်ခဲ့သောအနှစ်သုံးဆယ်ကျော် ကျမအပျိုဖော်ဝင်ရန်ပင် အတော်အတန်လိုသေးသည့် အချိန်တွင် မိခင်သည် မိသားစုကိုထားပြီး ထွက်သွားခဲ့သည်။ သိပ်ငယ်ခဲ့သော ထိုအချိန်က ကျမခူးသော လမ်းဘေးပန်းများသည် ကျမမသိခဲ့သော လူတစ်ဦး၏ နှင်းဆီလန်းများလောက် အမေ့ကို အလှဆင်နိုင်စွမ်း မရှိသည်ကို နားမလည်ခဲ့။ အမေပြန်လာမည်ထင်ပြီး အဖေ့ခြံထဲ လမ်းဘေးပန်းတွေ စိုက်နေခဲ့ဖူးသည်။ နှစ်နှစ်ကျော်ကြာတော့ ထိုပန်းတွေနှင့်ခွဲပြီး တနယ်တကျေးရှိ အဒေါ်နှင့်အတူတူနေခဲ့ရသည်။
မြို့ပြတွင် အလုပ်ရသောအဖေသည် တစ်ပတ်တစ်ခါသာ ကျမတို့မောင်နှမနား ကပ်နိုင်ခဲ့သည်။ အငယ်ဆုံးဖြစ်သော ကျမသည် အကြီးဆုံးဖြစ်သော အမလောက် အဖေ့ထံတွင် ရင်နှစ်မဆန်ခဲ့။ အပျိုကြီးဖြစ်သော အဒေါ်သည်လည်း ယောကျာ်းလေးဖြစ်သော အကို့ကိုသာအချစ်ပိုပြီး အလိုလိုက်ခဲ့သည်။
ဤသို့ဖြင့် ဘာသိဘာသာနေတတ်သော ကျမသည် မမနှင့်ကိုကို မလုပ်ချင်သော ရေခပ်ခြင်း၊ အိမ်တိုက်ခြင်း၊ ပန်းကန်ဆေးခြင်း၊ ထမင်းချက်ခြင်းများဖြင့် ငယ်စဉ်ကတည်းက အကျွမ်းဝင်ခဲ့သည်။ မြို့ပြ၏ လှပမှုများတွင် နီတွေးနေသော နှုတ်ခမ်းများရှိသည့် မိန်းမလှအချို့လည်းပါဝင်သည်။ ယောကျာ်းသားဖြစ်သော အဖေသည် ပုထုစဉ်ပီသစွာဖြင့် အရိုင်းဆန်သော ယဉ်ကျေးမှုကို အတုယူကာ ရင်နှစ်ကိုထား၍ ကြင်သစ်နားသွားခဲ့သည်။ မိုးတွေညိုနေမှန်း သိသော်လည်း မိုးခိုရန် ကိုယ်ပိုင်ထီးတစ်လက်ပင်မရှိခဲ့သော ထိုဘဝက မိုးတောထဲတွင်လည်း ရာဘာဖိနပ်အစုတ်ကိုလည်း ထီးလုပ်ဆောင်းတတ်ဖို့ သင်ကြားပေးခဲ့သည်။
ဒီလိုဒီလိုနဲ့ နှစ်တွေလတွေငိုတော့ ကျမ နှစ်ဆယ်မပြည့်ခင်မှာပင် အိမ်ထောင်ကျဖြစ်ခဲ့သည်။ ဖြစ်ပုံကတော့ ရည်းစားနှင့်ချိန်းတွေ့တာကို အကိုတွေ့သွားပြီထင်ပြီး အကြောက်လွန်ရာမှ ခိုးပြေးခဲ့ကြခြင်း ဖြစ်သည်။ အလွန်တင်းကျပ်ပြီး နားလည်မပေးတတ်သော အဒေါ်၏အရိပ်ကို မွန်းကျပ်နေသော ကျမအတွက် ရည်းစားထားခြင်းက ထွက်ပေါက်ဖြစ်ခဲ့သည်။ ကျမမှားခဲ့သည်လားတော့မသိ ငယ်ငယ်ရွယ်ရွယ်နဲ့ နှစ်ယောက်တစ်ဘဝစခဲ့မိတဲ့ ကျမတို့ ဒီလိုနဲ့ပဲ အိပ်မက်တွေလှအောင် အားတင်းခဲ့ရသည်။
ကျောင်းမပြီးသေးသော ခင်ပွန်းသည်၏ မိသားစုသည် ကျမငယ်ဘဝမိသားစု၏ နှစ်ဆမျှ ကြီးမားနေသည်။ သားသမီးတပြုံတမနှင့် ယောက္ခမက အကြီးဆုံးသား၏ အိမ်ထောင်ဖက်ကျမကို လားလားမျှသဘောမကျခဲ့။ တစ်ယောက်တစ်ပေါက်နှင့် ထိုမိသားစုသည် ဖရိုဖရဲကျလွန်းလှသော်လည်း အတူတကွ ပျော်ရွှင်ကြသည် အတူတကွ ဝမ်းနည်းရသည်။
မပြေလည်သောဘဝကို သုံညအဖြစ်က စရင်း၊ ချို့တဲ့နေတဲ့ လူတွေရဲ့ အပေါစားအတ္တများကြားမှာ ရှင်သန်ခဲ့ရသည်။ ခင်ပွန်းသည်၏ ရင်ခွင်အရိပ်သည် မိုးထဲလေထဲ အလုပ်လုပ်ခဲ့ရတဲ့ ညတွေမှာလည်း သူမအတွက်တော့ နားလည်မှုပြည့်ဝနေခဲ့သည်။ ရုန်းကန်နေခဲ့ရသော ထိုအချိန်ကတော့ လူတွေပြောပြောနေကျ ဖေးမခြင်းဆိုတာကို ယောင်လို့ပင်မမြင်လိုက်။
ရှိသမျှတွေကို ပေါင်နှံပြီးတော့ ပိုက်ဆံရှာတဲ့ ယောက္ခမက သူမ၏ ထမီများလည်း ချမ်းသာမပေးခဲ့။ ထို့ကြောင့်လည်း ထမီနှစ်ထပ်သုံးထပ်ကို ခိုင်ခိုင်မြဲအောင် သူမဝတ်တတ်ခဲ့သည်။ အရက်မူးတတ်တဲ့ ယောက္ခထီးကိုလည်း အဖေရင်းလိုပြုစုသည်။ ငယ်သေးတဲ့မတ်လေးတွေကိုလည်း ထမင်းချက်ကြွေးသည်။ လူအားလုံး သူတို့နည်းသူတို့ဟန်ဖြင့် အတ္တကြီးခဲ့သော်လည်း အနည်းဆုံးတော့ထိုလူအားလုံးက သူမအတွက် မိသားစုတွေဖြစ်နေခဲ့သည်။
ဤသို့ဖြင့် ကျမခင်ပွန်းသည် ကျောင်းပြီးသောအခါမှ ဘဝသည် အတန်ငယ် အဆင်ပြေလာခဲ့သည်။ “အပင်မြင့်လေလေတိုက်လေ”ဆိုသော စကားမှာ အလွန်တရာ မှန်ကန်လှသည်။ အနည်းငယ် အဆင်ပြေသောအခါ လူရာဝင်လာသော်လည်း မပေးကမ်းနိုင်ပါက အတင်းပြောချင်ကြသည်။
အထင်ကြီးခံရခြင်းသည် ကောင်းသည်ဟု ထင်ကြမည် သို့သော် အထင်ကြီးခံရခြင်းသည် မကောင်းပါ။ amplifier နှင့်တူသော လူတို့ပါးစပ်သည် ခင်ပွန်းသည်၏ လုပ်အားခကို နှစ်ဆမျှဖြစ်အောင် ချဲ့ကားကြသည်။ ရွှေငွေတွေအပြုံလိုက် စုဆောင်းထားသည် ဟုပင် ဆိုကြသေးသည်။
ငွေကြေးချောင်လည်သော်လည်း ဆွေမျိုးများအား အစဉ်ပေးကမ်းနိုင်ရန်ကား ကျမတို့အဆင်မပြေနိုင်ပါ။ လူပီသသော ကျမတို့တွင်လည်း အတ္တအချို့ရှိရသည်။ သုံးစွဲရမည် စုဆောင်းရမည်။ မွေးဖွားလာမည့် မွေးဖွားထားသည့် သားသမီးရတနာများ အတွက်လည်း ကြိုတင်ပြင်ဆင်ထားရမည်။ ပြီးတော့ ကိုယ်ပိုင်အိမ်လေးဖြင့်လည်း နေချင်သေးသည်။ လူသားတိုင်းမက်သော ရွှေရောင်အိပ်မက်တချို့ကို ကျမတို့လည်းမက်ခွင့်ရှိသည်။
သို့သော် လူဆိုသော အမျိုးမှာ အလွန်ကိုခက်သည်။ ပေးရင်တမျိုး မပေးရင်တမျိုး။ ကိုယ်တိုင်ကြိုးစားပြီး တက်လမ်းကိုတော့မရှာ အရပ်တကာလှည့်ပြီး လက်ဖြန့်တောင်းဖို့ကျတတ်သည်။ အဆင်မပြေ၍ ငွေကြေးအကူညီလိုသည် ကိစ္စမရှိ ကူညီနိုင်သည်။ ကိုယ်လည်း ဒုက္ခရောက်ဖူးတာပဲလေ ဒါပေမယ့် တတ်နိုင်သော ပမာနတော့ဖြစ်ရမည်။ ချဲတွေထိုးပြီး ရှူံးတော့မှ သိန်းနှင့်ချီပြီးဆပ်ဖို့ကျတော့ ကျမတို့လည်း မတတ်နိုင်ပြီပေါ့။ သာရေးနာရေးလား အထွေအထူးပြောစရာမလို ကုန်သင့်သလောက်တော့ကုန်ရမည်။ လူ့ပတ်ဝန်းကျင်မှာနေပြီး အချင်းချင်းဖေးမကူညီခြင်းရှိရမည်။ သို့သော် အမြဲတမ်းတော့ မဆင်မပြေနိုင်ပြီလေ။
“ကိစ္စများမြှောင်လူတို့ဘောင်”တဲ့ လူဖြစ်လာမှတော့ အဆင်မပြေခြင်းသည် ထိုသူတို့တွင်သာမက ကျမတို့၌လည်း ရှိသည်။ သို့သော် ထိုအရာကို အတ္တကြီးသောလူတို့နားမလည်ကြ။ ကိုယ့်ဒုက္ခကိုသာ ဒုက္ခဟုထင်တတ်ကြသည်မှာသူတို့အကျင့်။
ပြီးတော့ ကျမအဒေါ် ၊သူမက သူမနေသော ခပ်သေးသေး တောမြို့နယ်လေးတွင်သာ အတူနေစေချင်သည်။ အဒေါ့်အိမ်ကို အကြီးကြီးပြင်ဆောက်ရန် လုံလောက်သော ငွေကြေးအထောက်အပံ့မပေးဘဲ ရန်ကုန်တွင်အခြေချဖို့သာ ကြိုးစားနေသော ကျမတို့မိသားစုကို မျက်မုန်းကျိုးပြီး နောင်တွင် မခေါ်နိုင်မပြောနိုင်ဖြစ်ရသည့်အဆင့်ထိ ရောက်ခဲ့သည်။
အဒေါ့်ကျေးဇူးများစွာ ရှိပါသည်။ သို့သော် လူဆိုသည်မှာ ရေကြည်ရာမြက်နုရာကို ဖွေရှာရမည်။ ကျမတို့က အကြောင်းမဟုတ်သော်ငြား သားသမီးများရှိသေးသည်။ပိုကောင်းသော ပညာရေးတစ်ခု၊ ပိုအဆင်ပြေသော နေရာလေးတစ်ခု၊ ပြီးတော့လည်း သားသမီးများကို အလွန်အမြင်ကျဉ်းသော ကျမအဒေါ်နှင့်မထားလို။ အကို့ကိုသာ အချစ်ပိုသော အဒေါ်သည် အကို့သားသမီးများကိုလည်း အချစ်ပိုခဲ့သည်။ပေးကမ်းနိုင် မပေးကမ်းနိုင်အပထား ထိုကလေးများကိုတော့ ကျမသားသမီးများထက် ပိုအရာပေးတတ်သည်။ ဧည့်သည်ဆန်ဆန် ပျုငှာဟန်သာပြတတ်သည်။ နွေးထွေးခြင်း မေတ္တာလည်း မရှိ။ ခနတဖြုတ် အလည်လာဖို့လောက်သာ အဆင်ပြေသော ထိုအိမ်တွင် ကျမသားသမီးများအား လောင်းရိပ်မမိစေချင်။
ကျမ၏ လုပ်ရပ်များကို မှားသည်ဟုထင်သူလည်း ရှိသည် မှန်သည်ဟု ထင်သူလည်းရှိမည်။ ဘယ်လိုဖြစ်ဖြစ် အရေးတော့မကြီး အဓိက ကတော့ ကိုယ့်ဘဝလှဖို့သာဖြစ်သည်။ လူဆန်ရမည်။ အပြောခံနိုင်ရမည်။ အဆင်မပြေသောကိစ္စများကို အားမနာတမ်း ငြင်းရဲသော သတ္တိလည်းရှိရမည်။ ကိုယ့်ရန်သူကို ပြုံးပြနိုင်သော စိတ်ထားမျိုးလည်းရှိရမည်။ ခွင့်လွှတ်တတ်ရမည်။ သို့သော် အကြိမ်ကြိမ်အခါခါတော့ သဘောထားမကြီးနိုင်။
သနားညှာတာခြင်း ကိုယ်ချင်းစာစိတ်သည် ကိုယ်စွန့်လွှတ်ရဲသော အရာများအတွက်သာ ဖြစ်သင့်သည်။ ငွေလိုနေသော အိမ်နီးချင်းတစ်ဦးကို ငွေချေးငှား ခြင်းသည် ကုသိုလ်ရသည်လား မရသည်လား ကျမမသိ။ သို့သော် အနည်းငယ်သာ ပြန်ဆပ်ပြီး အီလည်လည်လုပ်တတ်သော သူများစွာနှင့်ကြုံဖူးပြီ။
ကျမသည် နတ်သိကြားမဟုတ်။ ငွေထုပ်ပိုက်ထားသော အလှူရှင်မဟုတ်။ သင့်တင့်သော အတိုးငွေကိုယူပြီး ပိုက်ဆံချေးသူသာ ဖြစ်သည်။ ကျမအသုံးလိုလျှင် ကျမငွေပြန်လိုချင်သည်။ သို့သော် ထိုကဲ့သို့သော တဖက်မြင် လူသားများအတွက်တော့ ကျမဘက်က လူဆိုးဖြစ်ခဲ့ရသည်။
တစ်ခါမဟုတ် နှစ်ခါမဟုတ် အခါခါ အယောက်ပေါင်းများလာတော့ ကျမစိတ်ကုန်လာသည်။ အတိုးမယူဘဲချေးပေးလိုက်သော ကိုယ့်ဆွေရင်းမျိုးရင်းကပင် ကိုယ်ငွေလိုတော့ ပြန်မပေးချင်။ ရှိရက်နှင့်မပေးတော့ ပိုဆိုးသည်။ ထို့ကြောင့် အခုနောက်ပိုင်းတွင် ကျမ သူတပါးကို ပိုက်ဆံမချေးတော့။ ချေးလျှင်လည်း ပြန်မရလည်းနေဟု သဘောထားနိုင်သောအခါမှ ချေးသည်။ လူတွေအမြင်မှာတော့ အကြင်နာတရားမရှိသူ ဖြစ်နေမည်။ သို့သော် ကိစ္စမရှိ အချိန်တန် ဒုက္ခရောက်လျှင် ထိုသူတို့သည်လည်း ကျမနှင့်အတူဝင်ခံမည်မဟုတ်။ အပေါ်ယံကြည့်ပြီး အပေါ်ယံပေါင်းပြီး လျှာအရိုးမရှိတိုင်း အသားလွတ်ပြောတတ်သော သူများအတွက် ကျမအချိန်အကုန်ခံပြီး ဖြေရှင်းချက်ပေးရန်မလိုအပ်။
ဘဝသည် ရေကန်နှင့်တူသည်။ အဖြစ်အပျက်တိုင်းသည် ခဲလုံးများဖြစ်ပြီး ကံတရားဟုခေါ်သော အရာက ထိုခဲလုံးများကို ကျမတို့ရေကန်လေးထဲသို့ပြစ်ချသည်။ ခဲလုံးကြီးရင် ကြီးသလို သေးရင်သေးသလို ပွက်ထတတ်သည်။ ခံစားချက်နည်းနည်းဖြင့် အသက်ရှင်တတ်လျှင်ပိုကောင်းသည်။ ထိုအခါ နောက်ကျိသွားသော နေရာကို ခပ်မြန်မြန်ပင် ပြန်၍အနည်ထိုင်ကြည်လင်အောင် လုပ်နိုင်သည်။ ပြန်မကြည်လင်နိုင်သော ရေကန်များရှိသလို ပြန်အနည်ထိုင်သော ရေကန်များလည်းရှိသည်။ ဒီလိုမဟုတ်ဘဲ နေရာအချို့ကွက်ပြီး နောက်နေသော ရေကန်များလည်းရှိသည်။
ကျမဘဝတွင် ပထမဦးဆုံးကျခဲ့သော ခဲလုံးသည် အတော်ကြီးပြီ တစ်သက်စာ အနည်ထိုင်ရန်ခက်ခဲစေခဲ့သည်။ ထိုခဲလုံးကို အမေဟုကျမကခေါ်သည်။
ကျမငယ်စဉ်ကတည်းက ထွက်သွားသော အမေ့ကို ကလေးသုံးယောက်မွေးပြီးချိန်ထိ ပြန်မတွေ့ခဲ့။ အမေကလည်း လာမရှာ ကျမကလည်းရှာဖို့ မကြိုးစားခဲ့။ ကြားရသော သတင်းအချို့ဖြင့်သာ မကျက်တကျက် ဒဏ်ရာများကို တူးဆွနေခဲ့သည်။ တစ်နေ့တော့ အမေရောက်လာသည်။ ကျမ အငယ်ဆုံးသားလေး မွေးဖွားပြီး တစ်နှစ်လောက်အကြာတွင် ဖြစ်သည်။
ထိုနေ့က အိမ်တံခါးတွင်ရပ်နေသော အမျိုးသမီးကို အမေဟု ဘယ်ပါးစပ်ဖြင့်ခေါ်ရမည်လဲ ကျမတွေးမရခဲ့။ အဲ့လို စကားတွေ လှည့်ပတ်ပြောနေရင်း ကျမစိတ်ထဲ ပျော်ရွှင်သလား ဝမ်းနည်းသလား ခံစားချက်တို့ ရှုပ်ပွနေခဲ့သည်။ သို့သော် ထိုခံစားချက်များကို တည်ငြိမ်စေခဲ့သောအရာမှာ အမေ့လာရင်းအကြောင်းပင် ဖြစ်သည်။ “သမီးညီမလေး မင်္ဂလာဆောင်တော့မှာမို့ သမီးရယ် လက်ဖွဲ့လိုက်ပါအုံး” တဲ့။ ပြုံးနေသော ကျမ ကြွက်သားများ ခတ္တတော့ အလုပ်လုပ်ဖို့မေ့ခဲ့ရသည်။ “အင်း ... အင်း .. ဖွဲ့ရမှာပေါ့” ဆိုသော စကားမှလွဲလို့ ကျမပို မပြောနိုင်ခဲ့။ ကျမညီမလေးတဲ့ ကျမသိသလောက်ကတော့ ကျမက အငယ်ဆုံးမဟုတ်လား။ အင်း အမေမွေးတဲ့ကျမညီမလေး။
မမြင်ဖူးသော ထိုညီမလေးအတွက် အမေလိုတဲ့ ပမာဏအတိအကျကို ကျမထုတ်ပေးခဲ့သည်။ သို့သော် ထိုလက်သည် ငယ်ငယ်က အမေ့ကိုပန်းပန်ပေးတဲ့ လက်ကလေးလောက် ရိုးသားခြင်းမရှိတော့၊ ပျော်ရွှင်ခြင်းမရှိတော့၊ ဒဏ်ရာများဖြင့် နာကျင်နေခဲ့ပြီ။ အမေ့လက်ကော ကျမပေးတဲ့ပန်းလေးကို ယူခဲ့တုန်းကလို ပျော်ရွှင်ရဲ့လား။ နာကျည်းခြင်းစွက်သော ရင်တွင်းခံစားချက်များကိုဖုံးကွယ်ရင်း အပြုံးသက်သက်ဖြင့်သာ အမေ့ကို နှုတ်ဆက်ခဲ့သည်။
မွေးသမိခင်ကျေးဇူးရှင် မြင့်မိုရ်တောင်ဦး မကကျူးသည့် မေ့မေ့ကျေးဇူး။ အင်း ကျမလည်း မိခင်တစ်ယောက်ဖြစ်နေပါပြီ။ မိဘနေရာတွင်ခံစားရပြီ။ သို့သော် မိဘတိုင်းသည် သားသမီးတိုင်းကို ချစ်သည်ဟူသော စကားကိုတော့ အပြည့်အဝမယုံ။ အမေ့ကိုကျမ မမုန်းရက်ပါ သို့သော် ချစ်ဖို့တော့မဖြစ်နိုင်တော့။ အဖေ့ကိုကော.....
အခုနောက်ပိုင်းတော့ အဖေအိမ်ကို ခနခနလာသည်။ အသက်အရွယ်ရလာသော အဖေသည် အလုပ်ကို သေချာမလုပ်နိုင်တော့။ အသက်ငယ်သော မိန်းမကိုယူထားသည့် အဖေ့ကိုလည်း ကျမသနားသည်။ သို့သော် ရုန်းကန်နေရသော ကျမကို အဖေသနားသည်လားတော့ကျမ မသိပါ။ ကြားရသလောက်တော့ အဖေသည် သူ့အိမ်တွင်ဆို ကျမတို့မောင်နှမများအကြောင့်း၊ သူ့မြည်းများအကြောင်းကို မမေးဘဲ မပြောဟုသိရသည်။ သို့သော် ကျမအိမ်ရောက်လျှင်တော့ သူ့ဇနီးအကြောင်းနှင့် သူ၏ ချစ်စဖွယ်ကောင်းသော သမီးငယ်အကြောင်းကိုပြောတတ်သည်။
ငွေကြေးမကန်တော့နိုင်သောအခါတွင် မျက်နှာထား သိပ်မကြည်သော အဖေ့မိန်းမကို ကျမသဘောမကျ။ ပြီးတော့ အသက်အရွယ်ကြီးကြီး ကျမအဖေကို ခိုင်းစားနေသော ကျမ၏ တဝက်တော် ညီမ အဖေ့သမီး။ သို့သော်လည်း အဖေသည် အဖေသာဖြစ်သည်။ အဖေသည် ထိုဘဝတွင်ပျော်ရွှင်သည်။ ကျမကတော့ အဖေလာလျှင်ထမင်းပြင်ကျွေးဖို့သာရှိသည်။ မိဘဆိုတာ ငြင်းပယ်စရာမှမဟုတ်တာ။
အသက်အရွယ် ကြီးရင့်လာတော့လည်း မာန်မာနတွေ အမုန်းတရားတွေကျခဲ့ရပြီ။ ထမင်းစားလျှင်ကျမကို ဟင်းမထည့်ပေးတတ်သော အဖေ။ ကျောင်းသွားလျှင် မမကိုသာ မုန့်ဖိုးပေးတတ်သော အဖေ။ ပျောက်သွားသောဖိနပ်ကို အစားမဝယ်ပေးဘဲ လမ်းမလျှောက်ရန်သာ ပြောခဲ့သော အဖေ။ ကျမချွေးတွေထက် အမွှေးနံ့သာကို ပိုနှစ်သက်ခဲ့သော အဖေ။ ကျမယောကျာ်းရရချင်း ပါးရိုက်ခဲ့သောအဖေ။ ယောက္ခမနှိပ်စက်တော့ အဒေါ့်အိမ်သွားဖို့ပြောခဲ့သောအဖေ။ အိမ်မှာအလှူလုပ်တော့ ဦးဦးဖျားဖျားလာစားသော အဖေ။ သူ့သမီးဆယ်တန်းအောင်တော့ ဆုချဖို့ ကျမကိုတိုက်တွန်းခဲ့သော အဖေ။ ကျမသမီး ဂုဏ်ထူးထွက်ပြီးအောင်တော့ အသိအမှတ်ပြုရန် လက်တွန့်နေခဲ့သောအဖေ။ မိန်းမနဲ့အဆင်မပြေသမျှကို ကျမအား လာပြောပြနေသော အဖေ။ သူချဲထိုးသမျှဒိုင်ခံရှင်းဖို့ ကျမအားနားချခဲ့သော အဖေ။
တစ်ခါတစ်လေ ဘဝမှာ သိပ်နာကျည်းလာတော့ ကျမလည်း အမွေပြတ်စွန့်လွှတ်ခြင်းကို ကြေငြာချင်စိတ်ပေါက်လာသည်။သို့သော် မိဘသည် မိဘသာဖြစ်သည်။ ရွေးစရာလမ်းမရှိ။ မိဘဖြစ်သောကျမသည်လည်း ကျမမိဘများ၏ ခံစားချက်များကို နားမလည်ခဲ့။
အခုတော့ အမွေပြတ်စွန့်လွှတ်ရန် အခွင့်အရေးပင်မရှိတော့။ အမေတစ်ယောက် မလာနိုင်တော့ပြီတဲ့လေ။ ဟိုတစ်ခေါက်မင်္ဂလာဆောင်ကိစ္စအတွက် ပိုက်ဆံတောင်းပြီးတည်းက အမေမလာတော့။ သို့သော် ကျမ၏ တဝက်တော်သော မောင်နှမများတော့လာခဲ့သည်။ အကြောင်းအမျိုးမျိုးပြပြီး ငွေတောင်းလွှာမတင်ပဲ ကျမဘဏ်က ငွေထုတ်ကြသည်။
ခင်ပွန်းသည်၏ ဆွေမျိုးများလည်းလာပါသည်။ သူတို့ကတော့ ပိုစိပ်သည်။ သို့သော်ကိစ္စမရှိ ကျမယောကျာ်းရှာလို့ရသမျှသည် ကျမနှင့်သာမက သူ့မိဘ မောင်နှမများနှင့်လည်းဆိုင်သည်။ အဲ့တော့တစ်ခါတစ်လေ ကျမဆွေမျိုးတွေကို ပေးကမ်းရတာ ကျမစိတ်မသန့်ချင်။ ဒါပေမယ့်လည်း အခုတော့နဲ့ အမေ့ဆီရောက်အောင် သွားရအုန်းမည်။ လောကကြီးက အမေထွက်သွားတဲ့နောက်ဆုံးခရီးမှာ အဆင်ပြေပြေ အေးအေးဆေးဆေးလေး ဖြစ်နေစေချင်သည်။ ဘယ်လိုပြောပြောအမေ့ကျေးဇူးကြီးမားလှပါသည်။
ရင်းနှီးခဲ့တဲ့ ခြံတခါးလေးကို ကျမဖွင့်ပြီးဝင်သွားတော့ လူနည်းနည်းများနေသည်။ ကျမစိုက်ခဲ့ဖူးတဲ့ လမ်းဘေးပန်းဝါဝါလေးတွေကတော့ ဂရုစိုက်သူမရှိလည်း ပွင့်လန်းမြဲဖြစ်နေသည်ကို တွေ့ရသည်။
အချိန်ကာလကြာခဲ့ပြီ သို့သောအရာရာသည် ကျမမှတ်ဥာဏ်တွင် လတ်ဆတ်ဆဲ။ အသက်(၇)နှစ်အရွယ် အမေထားခဲ့စဉ်က ငိုနေခဲ့သောကျမသည် အခုလည်း သွားလေသူအမေ့ကို တမ်းတပြီးငိုချင်လာသည်။
ကျမ မသိသော မျက်နှာစိမ်းများစွာနှင့် ကျမ မရင်းနှီးသော ကျမ၏ မောင်နှမများ ပြီးတော့ ကျမကို အခါခါထားခဲ့တဲ့ကျမအမေ။ ရင်ထဲမှာစို့နင့်၍မောပန်းလာသည်။ အမှတ်တရများက ဟိုတစ ဒီတစ ဖြင့် ကျမ ပတ်လည်တွင်ဝိုင်းရံလာကြသည်။ နောက်ဆုံး ဆုံးဖြတ်ချက်ကိုချရင်း ကျမအသက်ကိုဝဝရူသည်။ ပြီးတော့ လှေကားထစ်မှာထိုင်နေတဲ့ ကျမတူလေးကို စာအိတ်လေးတစ်အိတ်ပေးပြီး ထွက်လာလိုက်သည်။ ခြံအပြင်ရောက်တော့ ကျမပေးလိုက်တဲ့စာအိတ်လေး ကျမရဲ့ အမေတူညီမလေးလက်ထဲ ရောက်သွားတာကိုစောင့်ကြည့်ပြီး ဘယ်သူမှသတိမထားမိခင် ခပ်သွက်သွက်ပဲ လျှောက်ထွက်လာသည်။ အိမ်အပြန်လမ်းသည် ပိုပြီးခြောက်သွေ့နေသည်။ ပုံဖော်မရတဲ့အမေ့မျက်နှာက မျက်ဝန်းထဲမှာ တဝဲလည်လည်။
လမ်းထိပ်ကိုရောက်တော့ ကျမခူးနေကျ လမ်းဘေးပန်းဝါဝါများကို တွေ့သည်။ “ကောက်ညှင်းပေါင်း .. ပူပူလေး” ... ခူးမလိုပြင်နေသော ကျမလက်များသည် ထိုအသံအကြားတွင် ရပ်တန့်သွားသည်။ ပြီးတော့ တဆက်တည်း ... သမီးကြီးက ငချိတ်ပေါင်းကြိုက်တယ်၊ သမီးလတ်က အုန်းပြန်ပေါင်းကြိုက်တယ်၊ သားငယ်ကတော့ ပဲပြုတ်ပါတာကိုကြိုက်တယ် ဟုတွေးရင်း .. ကောက်ညှင်းပေါင်းသည်ကို ခေါ်ပြီး ကောက်ညှင်းပေါင်းဝယ်လိုက်သည်။
ပန်းဝါဝါလေးများကို ကျမ မခူးဖြစ်ခဲ့ပါ။ ကောက်ညှင်းပေါင်းကိုသာဝယ်ပြီး အိမ်ပြန်ရောက်ခဲ့သည်။ ကျမဘဝသည် မပြီးသေးပါ။ အမေကတော့ အေးဆေးသွားခဲ့ပြီ။ အမေ့အကြောင်းတွေတွေးပြီး ကျမဝမ်းမနည်းတော့ပါ။ ကျမတွင် ပိုအရေးကြီးသော မိခင်တစ်ယောက်၏ ဝန်တာများရှိသေးသည်။ ဇနီးသည်ဝတ်ကိုလည်း ကျေပြွန်ရမည်။ အဖေ့ကိုလည်း ဂရုစိုက်ရမည်။ သားသမီးများ ကောက်ညှင်းပေါင်း စားနေတာကိုကြည့်ပြီး အတွေးထဲတွင်အမေ့အား စကားတစ်ခွန်းဖြင့် နှုတ်ဆက်နေမိသည်။
“ကျမ မိခင်ကောင်းဖြစ်မှာပါ အမေ”
<နှံကောင်>
3 comments:
နှံကောင်ရဲ့  အိပ်ပျက်တဲ့ ညတစ်ည တန်တဲ့ ဝတ္တု တစ်ပုဒ်ပါ။ ကောင်းပါတယ်။
ကောင်းလှချီလား..
ငါလဲ အဖေ ဖြစ်ကြည့်ဖူးသေးတယ်.. ဟားဟား
အတွေးနက်နက်နဲ့ရေးထားတဲ့ ဘ၀ကို သေသေချာချာ
ဖတ်သွားပါတယ်... တစ်ကယ်ခံစားလို့ရတဲ့ ပို့စ်လေးပါ
Post a Comment